Mandati i Adriatik Llallës ka përfunduar dhe është hapur gara për zgjedhjen e kryeprokurorit të ri të përkohshëm. Një nga emrat e përfolur si kandidate për këtë detyrë, është edhe Arta Marku, prokurore në rrethin e Shkodrës.
Emri i 41-vjeçares nga Puka është lakuar edhe në listën e parë të prokurorëve të cilët po kalojnë në “skanerin” e vettingut. Ajo ka përfunduar në vitin 1999 shkollën e lartë në Shkodër, ndërsa Magjistraturën në 2001, dhe ka një eksperiencë prej 15 vitesh si zëvendësprokurore e këtij rrethi.
Gjithashtu, Marku garon edhe për Këshillin e Lartë të Prokurorisë. Mësohet se bashkëshorti i saj punon si Oficer i Policisë Gjyqësore (OPGJ) për qarkun Lezhë, Shkodër dhe Kukës. Vetë Marku përgjatë karrierës së saj 15-vjeçare në Prokurorinë e Shkodrës, nuk ka hetuar asnjë dosje të rëndësishme.
Deri më tani janë përfolur si kandidatë edhe prokurorët Ferdinand Elezi dhe Xhemal Saliaj. Mazhoranca ka bërë të ditur se gara është e hapur deri të martën në orën 18:00.
