Në Kosovë kanë nisur hetimet mbi individë dhe organizata të dyshuara për veprimtari kriminale, që kërcënuan Presidentin, kryeministrin dhe liderët opozitarë.
Pas takimit të Komisionit parlamentar për Siguri dhe Mbikëqyrje të Agjencisë së Kosovës për Inteligjencë (AKI) me drejtorin e kësaj Agjencie, Driton Gashi, bëhet e ditur se gjithçka po hetohet.
Ky takim, u thirr për të dëgjuar informacione nga drejtori i AKI-së rreth disa kërcënimeve, që kishin drejtuar individë dhe organizata të dyshuara kriminale, për festën e Pashkëve, çka kishte ndikuar në shtimin e masave të sigurisë në gjithë Kosovën. Kryetari i Komisionit parlamentar për Siguri dhe Mbikëqyrje të AKI-së, deputeti Haxhi Shala tha se kërcënimet ishin serioze.
“Të gjitha ato organizata janë tashmë nën hetime nga Prokuroria. Nuk kemi hyrë ne hollësi për të mos i dëmtuar hetimet”, ka thënë Shala.
Institucionet e sigurisë, sipas tij, të gjitha kërcënimet i marrin seriozisht dhe u janë përgjigjur në kohë.
“Sipas raportimeve të drejtorit të AKI-së, ka qenë një situatë serioze, por për fat nuk ka ndodhur asgjë”, ka thënë Shala.
Po ashtu, ai ka konfirmuar edhe njëherë se informacionet e organeve të sigurisë dëshmojnë se objektiv i sulmeve ishin menduar figurat politike, nisur nga presidenti, kryeministri si dhe disa liderë të opozitës.
