Nishani dënon sulmin në Mançester: Vendet e lira nuk i gjunjëzohen terrorizmit

Akti terrorist në Arenën e Mançesterit, ku gjetën vdekjen të paktën 22 persona dhe afro 60 të tjerë u plagosën, është dënuar me forcë nga Presidenti i Republikës, Bujar Nishani.
“Kreu i Shtetit shqiptar shpreh hidhërimin e thellë mbi viktimat e pafajshme dhe të plagosurit e shumtë të akteve të mbrëmshme terroriste“, thuhet në mesazhin ngushëllues.
“Shpreh ngushëllimet më të sinqerta familjarëve e të dashurve të viktimave dhe autoriteteve britanike, ndërsa të lënduarve u uron shërim sa më të shpejtë. Në solidaritet të plotë me qytetarët dhe autoritetet britanike, Presidenti Nishani i dënon me forcë këto akte mizore dhe nxitësit e tyre, duke theksuar se terrorizmi nuk do të arrijë t’i mposhtë e gjunjëzojë vendet e shoqëritë e lira”, përfundon mesazhi i Presidentit të Republikës.