Data 20 gusht shënon nisjen e pelegrinazhit drejt malit të Tomorrit, një mal i konsideruar “i shenjtë”, pasi në të prehet shenjtori i familjes së Profetit Muhamed, Abaz Aliu.
Festa e Shenjtë e Bektashinjve organizohet nga 20-25 gusht, dhe mbledh çdo vit në Teqenë e Kulmakut rreth 300-400 mijë pelegrinë nga e gjithë Shqipëria, Diaspora e bota.
Mali i Tomorrit mbushet plot nga qytetarët gjatë 5-ditëve të pelegrinazhit, të cilët udhëtojnë drejt Teqesë së Kulmakut, për të kremtuar festën e Baba Tomorrit, nën ritmet fetare të bektashinjve, pavarësisht besimeve fetare që i përkasin.
Besimtarët ngrenë çadrat e tyre në këtë vend të shenjtë, duke kryer jo vetëm kurbanin e festës, por duke ngjitur me këmbë edhe majën e Malit të Tomorrit, i cili ndodhet 2416 metra mbi nivelin e detit.
Besimtarët dhe pelegrinët që i bashkohen kësaj feste të shenjtë, në shenjë mirësie bëjnë kurban një qengj për veten dhe familjen.
Mali i Tomorrit konsiderohet mal i shenjtë, pasi në të prehet shenjtori i familjes së profetit Muhamed, Abaz Aliu. Ditët e pelegrinazhit në malin e Tomorrit përfundojnë në 25 gusht, por kulmi i kësaj feste arrin në datën 23 gusht.
