Dje ka nisur edicioni i 14-të i Festivalit “Ditët e Komedisë Shqiptare” në Preshevë.
Ky festival u hap mbrëmë në Teatrin e Preshevës, i cili gjithashtu i përurua mbrëmë zyrtarisht me shfaqjen “Maratonistët” nën regjinë e regjisorit Kastriot Saqipi.
“Ditët e Komedisë Shqiptare” do të mbahen deri më 17 nëntor, ku do të shfaqen gjithsej edhe katër shfaqje të tjera.
Sot, në teatrin e Preshevës do të vihet në skenë shfaqja nga Qendra Multimedia në Prishtinë, “Peer Gynti nga Kosova” me autor Jeton Neziraj e regji të Agon Myftarit.
Më 15 nëntor do të shfaqet “Kripë deti” e Teatrit të Tetovës me regji të Nehat Mehmetit, ndërsa më 16 nëntor do të vihet në skenë shfaqja nga Teatri Shqiptar i Shkupit “Shfaqja që shkon mbrapsht” me regji të Agon Myftarit.
“Tartufi” nga teatri “Migjeni” e Shkodrës, me regji të Kushtrim Bekteshit, do të vihet në skenë në natën e fundit të festivalit, më 17 nëntor.
Juria përbëhet nga Fatmir Spahiut-aktor, Osman Ahmeti-aktor, Ben Apolloni-regjisor. Në fund të festivalit do të ndahen edhe 7 çmime për më të mirët e këtij festivali.
