Prokuroria e Përgjithshme e Maqedonisë ka zbuluar emrin e personit që dha urdhër dhe organizoi huliganët që të futeshin më forcë në Kuvendin maqedonas. Mësohet se njëri nga truprojat e Nikolla Gruevskit ka dhënë urdhër për ndërhyrjen e dhunshme në Kuvend mbrëmjen e 27 prillit.
Sipas dëshmisë, urdhri është dhënë ndërkohë që Gruevski ka qenë në Vjenë, pikërisht në ato momente është bërë thirrja telefonike tek organizatorët e ndërhyrjes në Kuvend, shkruan portali Gjyqësori (Sudstvo).
Aleksandër Vasilevski i njohur me nofkën Ninxha me urdhër të personit të stafit të sigurimit të Gruevski, që po e shoqëronte ish-kryeministrin ka urdhëruar që të mobilizohen 68 dhunues huliganë në orë 14.30, të cilët janë tubuar në një nga restorantet buzë Vardarit, ku atyre u janë shpërndarë maskat.
Në ora 18.58 në aktakuzë thuhet se dikush i është lajmëruar Nikolla Mitrevskit – Koljos për të kryer sulmin e dhunshëm. Në aktin 15 faqesh është përshkruar kronologjia dhe përshkrimi i veprimeve të dhunuesve.
