Ish-kryeministri Berisha vijon me të njëjtin intesitet denoncimet, të cilat i përcjellë përmes rrjeteve sociale. Ai ka ndarë me qytetarët një mesazh, përmes të cilit lëshohen akuza të rënda për korrupsion ndaj Ministres së Arsimit, Lindita Nikolla, dhe disa prej zyrtarëve më të lartë të kësaj ministrie.
Në denoncimin e bërë nga qytetari dixhital, evidentohet ndër të tjera edhe çështja që lidhet me një VKM fantazëm përmes të cilës i “dhurohen” institucionit të kontrolluar nga “njeriu i Nikollës”, disa kompetenca të jashtëzakonshme, ekskluzive dhe shumë fitimprurëse në lidhje me administrimin e rrjetit të studentëve, por edhe në prodhimin e analizave, statistikave për projektet e arsimit të lartë dhe kërkimit shkencor”, të gjitha këto kundrejt pagesës së atyre që marrin shërbimin.
Qytetari shkruan më tej se për të miratuar këtë VKM, kanë firmosur të gjithë rektorët e universiteteve publike, në pritje të pjesëmarrjes dhe të rektorëve të universiteteve jopublike.
