1899 – Hyn në fuqi marrëveshja që i dha fund Luftës spanjollo-amerikane.
1919 – Themelohet Organizata Ndërkombëtare e Punës – si pjesë e Traktatit të Versajës, që i dha fund Luftës së Parë Botërore, për të pasqyruar besimin se paqja universale dhe e qëndrueshme mund të realizohet vetëm nëse bazohet në drejtësi shoqërore.
1921 – Në shtetin Iowa vendoset taksa mbi cigaret për herë të parë.
1945 – Lufta e Dytë Botërore: Aleatët çlirojnë kampin e përqendrimit Buchenwald. Kampi gjermano-nazist ngritur në Ettersberg, pranë Weimarit, Gjermani, në korrik të vitit 1937, ishte një nga kampet e para dhe më i madhi në tokën gjermane, pas Dachaut.
1970 – Apollo 13 niset për në Hënë. Vetëm Apollo 13 nuk mundi të zbriste në sipërfaqen hënore, gjatë projektit amerikan prej 7 fluturimesh në Hënë. Tre ditë pas nisjes nga Toka, një shpërthim bombole oksigjeni e dëmtoi anijen, ndërsa astronautët humbën shumë prej sasisë së oksigjenit. Atyre iu desh të anulonin zbritjen në Hënë dhe e përdorën sondën e zbritjes si “varkë shpëtimi”. Oksigjeni i saj i mbajti astronautët gjallë, gjatë udhës së kthimit në Tokë.
1985 – Shqipëria në zi, vdiq Enver Hoxha, në moshën 76 vjeçare; “humbje e thellë” do ta quante shtypi nën kontrollin e tij, në Shqipëri; “vdiq diktatori më mizor” do të njoftonin mediat në botë; Homazhe të shumta, koreografi masive u bënë para arkivolit. Ramiz Alia, pasardhësi i tij, nuk lejoi që në pllakën e varrit të vihej data e vdekjes, duke thënë se për Enverin ka vetëm ditëlindje. “Fatkeqësisht për Shqipërinë, Alia duket se kishte të drejtë. Shqipëria vazhdon të jetojë me trashëgiminë e Hoxhës, dhe do të vazhdojë deri për një fare kohe”.
