Sot besimtarët ortodoksë dhe katolikë festojnë Pashkët. Në mesnatë, ata kremtuan “ngjalljen e Krishtit”, e cila u drejtua nga kryepeshkopi Anastas Janullatos, ndërsa mijëra besimtarë u mblodhën në katedralen ortodokse në Tiranë.
Gjithashtu, dhjetëra të tjerë iu drejtuan katedrales së “Shën Palit”, në meshën që nisi pas orës 23:00.
Me qirinj në duar, duke simbolizuar fitoren e jetës mbi vdekjen, besimtarët ndoqën meshën e shenjtë, duke uruar njëri-tjetrin për paqe, begati e lumturi.
Traditë e festës së Pashkës janë vezët e kuqe, të cilat simbolizojnë traditën e hershme të kësaj feste. Flaka e ndezur simbolizon dhe Ringjalljen e Krishtit, pas sakrifikimit të tij në kryq.
