Kur gjithë sportet janë të pushtuar nga përdorimi i dopingut, në Korenë e Jugut dënimet vijnë për një fakt tjetër. Bëhet fjalë për dy skiatorë, të cilët janë bërë shembull nga shteti dhe janë pezulluar përfundimisht nga Federata. Ata janë pezulluar për shkak të ngacmimeve seksuale gjatë Kupës së Botës të mbajtur në Japoni.
Federata Koreane e Skive njoftoi se ka vendosur të sanksionojë me pezullimin përfundimtar Choi Jae-Woo dhe Kim Ji-hyon, 24 vjeç dhe 23 vjeç, për sjelljen e tyre gjatë garës akrobatike të mbajtur më 3 dhe 4 mars në qytetin japonez Tazawako. Sipas Federatës, të dy skiatorët ftuan shoqet e tyre për të pirë me ta, por kur ato refuzuan, me sa duket i sulmuan seksualisht.
Skiatoret e prekur kanë raportuar rastin në polici, njoftoi agjencia Yonhap. Choi dhe Kim garuan në ekipin kombëtar në Lojërat Olimpike Dimërore të PyeongChang, që u zhvilluan ndërmjet 9 dhe 25 shkurt.
Rasti i dy skiatorëve vjen në dritë në kulmin e lëvizjes “#MeToo” në Korenë e Jugut, ku shumë femra kanë vendosur të denoncojnë javët e fundit figurat e shquara të kulturës apo politikës për ngacmimet seksuale. Theksojmë se skandali i ngacmimeve seksuale filloi me regjisorin hollivudian, Harvey Weinstein, i cili u akuzuar prej një numri të madh të aktoreve hollividuiane.
