Nga:
Fushata zgjedhore e bërë nga Donald Trump, pagesat dhe çdo lidhje e mundshme me Rusinë, kanë qenë titujt kryesor i mediave ndërkombëtare. Por, veç tyre janë edhe disa vështirësi të tjera ligjore.
Në New York dhe Washington, lista e investigimeve për Trump është duke u zgjeruar aq shumë, sa mund t’i shkaktojë më shumë se një dhimbe koke presidentit. Më poshtë Tirana Today ju sjell 6 nga akuzat ligjore të cilat rëndojnë mbi Trump dhe janë nën hetim e sipër.
Paratë e inaugurimit presidencial
Pak ditë më parë, gazeta Wall Street Journal raportoi se komisioni përgjegjës për inagurimin presidencial të Trump në 2017-ën, është duke u investiguar nga policia.
Komisioni arriti rekordin prej 107 milion dollarë në dhurime. Duke përfshirë 14 milionë dollarë nga donatorët që punonin për kompanitë e letrave me vlerë dhe investimeve. Dhe gati 10 milion dollarë nga donatorë që kishin lidhje me industrinë e pasurive të paluajtshme.
Ky total është dyfishi i shumës së arritur më parë për një fond inaugurimi, i vendosur nga Barack Obama në 2009.
Nëpërmjet këtij hetimi pritet të zbulohet se si u shpenzuan paratë e inaugurimit dhe nëse kontribuuesit kërkuan të kenë akses në administratën e re.
Një raport i ProPublica ngriti shqetësimin se Hoteli Ndërkombëtar i Trump në Washington kreditoi komisionin inagurues më shumë seç duhej, për dhomat, ushqimin dhe shërbimet e tjera. Duke shkelur në këtë mënyrë ligjin tatimor.
Sekretarja për mediat në Shtëpinë e Bardhë, Sarah Huckabee Sanders tha se kjo “nuk ka të bëjë aspak me presidentin apo Zonjën e Parë”, kur u pyet për raportin e Wall Street Journal. Kjo mund të jetë e vërtetë, por disa nga miqtë dhe bashkëpunëtorët më të ngushtë, përfshirë edhe vajza e tij, Ivanka; ishin shumë të përfshirë në planifikimin e inaugurimit.
Ndikimi i huaj
Fokusi kryesor i investigimit të avokatit Robert Mueller, është të zbulojë çdo lidhje midis fushatës presidenciale të Trump dhe Rusisë. Por, sipas raporteve të fundit hetimi është zgjeruar edhe në kontinente të tjera.
Një artikull nga Daily Beast zbuloi se “faza e dytë” e investigimit të avokatit do të nisë në fillim të vitit të ardhshëm. Sipas tyre kjo fazë do të përfshijë hapjen e dosjeve gjyqësore, padi të mundshme për të treguar lidhjet e fushatës së Trump me Arabinë Saudite, Izraelin dhe Emiratet e Bashkuara Arabe.
Ndërkohë New York Times e lidhi këtë lajm edhe me investigimin e inaugurimit. Duke shtuar se investiguesit federalë në New York janë duke parë nëse të janë kryer donacione të huaja ilegalisht për komisionin e inaugurimit. Ndërkohë Presidenti Trump e ka quajtur investigimin e Mueller një “gjueti shtrigash” dhe do të kundërshtojë me forcë zgjerimin e hetimit.
Trump ka qenë shumë përkrahës ndaj presidentit të Arabisë. Madje ka ofruar mbrojtje ndaj Prince Mohammed bin Salman, pas vrasjes së gazetarit Jamal Khashoggi.
Hotelet Trump
Pak pasi u zgjodh president, Trump lajmëroi se bizneset e tij do të dhuronin të gjitha të ardhurat që rrjedhin nga qeveritë e huaja, te Thesari i Shteteve të Bashkuara.
Në mars Organizata Trump dhuroi 151,470 dollarë fitime nga qeveritë e huaja të mbledhura gjatë 2017-ës. Dhe pse nuk jepte detaje më të zgjeruara.
Kjo procedurë u krijua për të shmangur dështimin e klauzolës së shpërblimeve të huaja të Kushtetutës së SHBA-së, e cila ndalon zyrtarët federalë të marrin dhurata ose pagesa nga përfaqësuesit e huaj.
Megjithëse avokatët e presidentit thanë se donacionet e tilla nuk ishin të detyruara, por Trump u zotua të bënte këtë “për të eliminuar çdo keqkuptim duke shkuar përtej asaj që kërkon Kushtetuta”.
Megjithatë, në qershor, avokatët e përgjithshëm për Distriktin e Kolumbia dhe Maryland paditën Trump. Me pretendimin se presidenti po vazhdon të përfitojë nga shpenzimet e qeverive të jashtme për pronat e tij. Veçanërisht hoteli i tij i madh, i cili ndodhet shumë pranë Shtëpisë së Bardhë në Uashington.
Fondacioni bamirësisë Trump
Përveç hetimeve të vazhdueshme federale të presidentit dhe interesave të tij, hetuesit në New York, po kryejnë edhe një rishikim të fondacionit bamirës të presidentit.
Prokurorja e Përgjithshme Babara Underwood ka pretenduar se Fondacioni i Trump ka shërbyer në favor të politikës së Trump dhe interesave të biznesit. Duke qenë kështu në kundërshtim me ligjet e shtetit në lidhje me statusin e taksave për organazitat e bamirësisë. Ndërkohë Trump e quajti investigimin punën e një “demokrateje të lodhur” dhe me mburrje shtoi se ka dhuruar për bamirësi më shumë se 19 milion dollarë.
Avokatët e Trump u munduan ta mbyllnin çështjen, por në fund të muajit nëntor një gjykatëse në New York vendosi që “mbështes pretendimin që z.Trump me dashje ka përdorur asetet e fondacionit për interesat private, duke e ditur që ato nuk ishin në interesin më të mirë të fondacionit.” Kështu çështja mbetet ende e hapur.
Gjatë fushatës në 2016, një reporter i Washington Post zbuloi se Trump po përdorte paratë e fondacionit të bamirësisë, për të mbyllur paditë ndaj bizneseve dhe të bënte dhurime për të marr mbështetje presidenciale.
Ryshfetet
Të mërkurën, Michael Cohen, ish avokati personal i presidentit, shpjegoi se si ndihmoi në dhënien e pagesave për dy gra që ishin gati të flisnin për marrëdhëniet e tyre seksuale me Trump gjatë fushatës zgjedhore.
Si pjesë e një marrëveshjeje për pranimin e fajësisë me prokurorët federalë në New York, ai pranoi akuzat për shkelje të ligjit për fushatën në lidhje me financat.
Në dosjet e gjykatës dhe deklaratat pasuese ai ka thënë se po vepronte me dijeninë dhe vendimet janë marr nga vetë Trump. Këtë gjë Presidenti e ka kundërshtuar me forcë.
Ndërhyrja ruse
Michael Cohen gjatë marrjes në pyetje ka pohuar se gjatë fushatës zgjedhore presidenciale, Trump bëri negociata me disa zyrtarë rusë, për ngritjen e një sipërmarrje miliona dollarësh në Moskë.
Në dosjet gjyqësore që përfshinte dënimin e ish-këshilltarit të sigurimit kombëtar të Trumpës, Michael Flynn, zyra e avokatit ka zbuluar gjithashtu ekzistencën e një hetimi penal të padeklaruar më parë. Presidenti Trump ka thënë se nuk kishte bashkëpunim me Rusinë dhe e hodhi poshtë hetimin si një konspiracion demokratik.
Shumë individë që u përfshinë me fushatën e Trump, kishin lidhje me Rusinë. Ndërkohë që edhe qeveria ruse është akuzuar për përfshirje në një luftë kibernetikë, në mbështetje të kandidaturës presidenciale të Trump./ Përshtati: Tirana Today Burimi: BBC
