Bashkëjetesa Neymar Jr.-PSG duket se është shumë pranë divorcit. Ylli brazilian vazhdon me tekat e tij dhe tashmë duket se ka vendosur që të mos zbresë më në fushë me parisienët.
Neymar ka mbetur i pakënaqur nga mënyra se si është trajtuar nga tifozët në Francë dhe raportet me pjesën më të madhe të skuadrës nuk janë të mira. Për këtë arsye ai ka vendosur që ti japë fund aventurës me transalpinët dhe të mendoj një rikthim në Spanjë.
Sipas asaj që publikohet në median spanjolle, sulmuesi 26-vjeçar është penduar për largimin e tij nga Barcelona për të shkuar në kampionatin francez. “El Mundo Deportivo” bën të ditur se Neymar i është vetëofruar klubit katalanas për një rikthim të tij në Camp Nou, por drejtuesit e Barcelonës e pritën shumë ftohtë këtë ide të tij, kjo edhe për shkak të mënyrës së largimit të tij nga nënkampionët e Spanjës.
Në mediat madrilene, e përditshmja “AS” këmbëngul në interesin e fortë të Realit të Madridit për Neymar. Por, problemi në këtë pikë qëndron te vlera e kartonit të futbollistit, pasi Paris Saint Germain nuk dëshiron të dalë me humbje nga këto tratativa, me francezët që pretendojnë të arkëtojnë nga shitja e tij një shumë vërtet të majme. Gjithnjë sipas “AS”, përfaqësuesit e Realit të Madridit kanë shprehur gatishmërinë për të paguar rreth 400 milionë euro për të bindur Al Khelaifin që të lejojë transferimin e brazilianit në kryeqytetin spanjoll.
