Ish-kryetari i Kuvendit të Kosovës, Nexhat Daci, ka komentuar situatën politike në Kosovë.
Daci e ka quajtur papjekuri të liderëve politikë zvarritjen e konstituimit të institucioneve, si dhe ka kritikuar kërkesën e Vetëvendosjes që koalicioni PAN të ndërrojë kandidatin për kryetar të Kuvendit.
“Kjo lojë që po bëhet me Kosovën është papjekuri politike e deputetëve dhe liderëve të partive politike.
Është një lojë që nuk i bën mirë askujt. Befasohem me papjekurinë e liderëve politikë, në radhë të parë, dhe me mungesën e guximit të lirisë të deputetëve që janë zgjedhur në parlament. Nuk është as e drejtë as e moralshme. Por morali në politikën ballkanike nuk ekziston.
Është gazmore kur të zotit të shtëpisë ju i thoni që nuk je. Ku keni parë e ku keni dëgjuar, në cilin vend ndoshta, që t’i thuash kryetarit të një partie që i ka fituar zgjedhjet në koalicion, apo si i ka fituar zgjedhjet, ta kushtëzosh që ti nuk mundesh të jesh, por mundet të jetë dikush tjetër prej partisë tënde?”, ka thënë Daci për “Ekonomia Online”.
