Gary Neville ka qenë për shumë vite kapiten i Manchester United, në periudhën e artë kur kjo skuadër drejtohej nga Alex Ferguson. Por ai ka treguar se gjatë kësaj periudhe, për shkak të dëmtimeve, mendonte se nuk mund të jepte më kontributin e tij ashtu siç do të dëshironte.
Kështu, në “Sky Sports” ai tregoi se kishte shkuar të takonte Ferguson për t’i shprehur dëshirën që shiritin ta merrte një tjetër lojtar i “djajve të kuq”. “U dëmtova një vit pasi më vendosën kapiten dhe ishte shumë e vështirë. Ndaj shkova të trajneri dhe i thashë që nuk isha më në gjendje ta kryeja këtë rol, si dhe se kishte shumë lojtarë të tjerë të përshtatshëm, që nga Ronaldo, te Rooney,Scholes, Giggs, Evra e Van Der Sar.
Ferguson as nuk deshi të dëgjonte dhe më tha vetëm se do të alternoheshim unë dhe Ryan Giggs, sepse po t’ia jepte Ronaldos, do të çmendej Rooney dhe e anasjellta”, tregoi Neville, duke konfirmuar kësisoj rivalitetin e ndezur që ishte asokohe mes anglezit e portugezit, edhe pse të dy ishin pjesë e të njëjtës skuadër.
