Dita e nesërme është afati i fundit për regjistrimin e koalicioneve në Komisionin Qendror të Zgjedhjeve. Kreu i Partisë Socialiste dhe, njëherësh, kryeministri Rama, nuk e ka gjetur ende gjuhën e përbashkët për vijimin e koalicionit me aleatin e tij në qeverisje, Ilir Meta, përderisa midis tyre qëndron Lulzim Basha.
Pas dështimit të takimit të fundit midis dy liderëve të koalicionit qeverisës, asgjë nuk ka ndryshuar. Për më tepër, Lëvizja Socialiste për Integrim, u kujdes sot, përmes nënkryetarit të saj, Luan Rama, t’i adresojë një mesazh të prerë kryeministrit Edi Rama, se pa zgjidhur krizën politike me opozitën nuk ka rinovim të marrëveshjes së koalicionit.
“Zgjedhjet janë më të rëndësishme sesa koalcioni. Interesi kombëtar i shqiptarëve është më i rëndësishëm sesa koalicionet politike. Problemi i madh janë zgjedhjet, detyrimi i madh që ka e gjithë klasa politike, veçanërisht mazhoranca për shkak të përgjegjësive që ka për të qeverisur dhe realizuar zgjedhje sipas standardeve është dialogu me opozitën përfshirja e saj në zgjedhje, për të realizuar më në fund pas 27 vitesh pas një sage problematike me zgjedhje të kontestuara, zgjedhje të lira, të barabarta, transparente ku secili aktor të shpalosë alternativën e vet”, – u shpreh Rama.
