“Rama, jepe dorëheqjen!”, “Lironi çunat, lironi trimat”, thërrasin protestuesit në këtë ditë të 34-tër të protestës. Para mbërritjes para Kryeministrisë, në mënyrë simbolike qytetarët kaluan para Ministrisë së Brendshme, pas arrestimit të 19 protestuesve ditën e djeshme. Aktivistja dhe pjesë e grupit organizatues të protestës, Sidorela Vatnikaj solli shqetësimet e ngritura nga Komiteti Shqiptar i Helsinkit për dhunën joproporcionale të ushtruar nga policia. Ajo kërkoi hetim të pavarur dhe lirimin e menjëhershëm të protestuesve.
”Pas ngjarjes së djeshme ne kemi përgatitur një deklaratë. Deklaratë kundër dhunës: Protesta është e drejtë kushtetuese, çdo përpjekje për t afrikësuar apo shtypur përbën shkeljen e të drejtës themelore. Dënojmë përdorimin e gazit pa paralajmërim, shtyrjen e protestuesve. Monitorimi i KSHH ka konstatuar tejkalim të kompetencave të policisë. I kërkojmë policisë të japë shpjegime dhe të mundësojë hetim të pavaruar për tejkalim të kompetencave, çdo efektiv duhet të mbajë përgjegjësi. Dhuna e ushtruar ndaj një protestuesi në Zvërnec, nuk ishte rast i izoluar sepse një grup protestuesish dje u përballën me dhunë joproporcionale. Kërkojmë lirimin e menjëhershëm, ndalimet arbitrare dhe dhuna nuk mund të përdoren si mjet frikësimi”, tha ajo.
Nga ana tjetër, Vatnikaj ka lexuar në protestë edhe një komunikat ku i bën thirrje ndaj Policisë së Shtetit për të ndalur kontrollin e emigrantëve që po vijnë në Shqipëri për të qenë pjesë e protestës mbarëkombëtare të thirrur për ditën e nesërme. Ajo e ka cilësuar një veprim të tillë si represion policor, ndërsa u ka bërë thirrje bluve që të mos ushtrojnë dhunë dhe të mos lejojnë dhe tolerojnë të infiltruarit në protestë që mund të provokojnë dhunë.
”Të shqetësuar për kontrolle të imtësishme në kufi për diasporën që po vjen në Tiranë. Ndalni dhunën dhe represionin policor. I bëjmë thirrje Policisë së Shtetit që në protestën e nesërme të distancohet nga çdo akt dhune dhe nga tolerimi i personave të infiltruar. Detyra juaj është të garantoni sigurinë e qytetarëve, jo të nxisni dhunë. U bëjmë thirrje qytetarëve shqiptarë që do t’i bashkohen nesër protestës të mbrojnë karakterin paqësor të saj”, tha ajo.
