Ilir Meta, kryetari i Partisë së Lirisë, ka reaguar ndaj lajmit se do të paraqitet në SPAK, duke pretenduar se njoftimi i tij është bërë përmes mediave të afërta me Partinë Socialiste.
Në një postim në rrjetet sociale, Meta, i cili aktualisht ndodhet në burg, ka deklaruar me ironi se do të shkojë në SPAK për t’i marrë vetë në pyetje përfaqësuesit e kësaj strukture.
“Sapo mësova nga mediat e regjimit se nesër unë, lideri i Partisë së Lirisë, forcës së dytë opozitare dhe forcës së tretë politike në vend, jam thirrur për t’u pyetur nga organizata kriminale SPAK, e cila firmosi rrëmbimin tim të paligjshëm dhe banditesk. Padyshim që do jem atje për t’i marrë unë në pyetje,” shkruan Meta.
Ai gjithashtu ka shtuar se pas seancës në SPAK do të jetë i gatshëm të përgjigjet për çdo pyetje nga gazetarët. “Pas kësaj seance jam i hapur për çdo pyetje nga mediat që do të jenë të pranishme,” përfundoi Meta.
