Pas vendimit që dhanë ministrat e Jashtëm të vendeve të BE për shtyrjen me një vit të çeljes së negociatave për Shqipërinë, ka reaguar edhe kryetari i Partisë Demokratike Lulzim Basha.
Me anë të një statusi në rrjetin social “Facebook”, Basha thekson se krimi dhe korrupsioni po mbajnë peng të ardhmen e vendit. Mes të tjerash lideri i PD-së bën parashikimin e frikshëm ndërsa shton se vendimi në 2019 do jetë refuzues si sot.
Postimi i plotë i Lulzim Bashës
Hapja e negociatave për Shqipërinë u shty edhe për një vit. Krimi dhe korrupsioni po mbajnë peng të ardhmen tonë. Pa luftuar krimin dhe korrupsionin, vendimi në 2019 do jetë refuzues si sot.
Tani është momenti për një kthesë të madhe për të shpëtuar vendin dhe të ardhmen tonë europiane.
Ministrat e Jashtëm të Bashkimit Evropian ranë dakord sot që negociatat për anëtarësim me Shqipërinë dhe Maqedoninë të hapen në qershor të vitit 2019, të kushtëzuara me përparimin e tyre në disa fusha. Vendimi për Shqipërinë dhe Maqedoninë u ndërmor pas debateve të shumta në samit, për shkak se Holanda, Danimarka dhe Franca ishin hezituese.
