Pengesa e fundit, që duhet të kapërcejë Italia për të arritur “play-off”-in dhe ndoshta kualifikimin për Kupën e Botës, që do të luhet vitin tjetër në Rusi, është e përfaqësuar nga Shqipëria e Christian Panuccit. Të hënën, më 9 tetor, në orën 20:45, në “Loro Boriçi” të Shkodrës, përballë axurrëve do të jetë kombëtarja shqiptare, që është për momentin forca e tretë e Grupit G, me 13 pikë në 9 ndeshje (4 fitore, 1 barazim dhe 4 humbje) dhe mban pozitën e 66-të në renditjen e FIFA-s. Kuqezinjtë pësuan një humbje (3-0) në Alicante, ndaj Spanjës, duke pasur mungesën e tre titullarëve: të mbrojtësit qendror Mërgim Mavraj, të mesfushorit difensiv Burim Kukeli dhe mesfushorit sulmues Odise Roshi. Për këtë arsye, trajneri Panucci ka vendosur për një mbrojtje të paparë me pesë lojtarë kundër “La Roja”, duke shpresuar që të mos shkundej nga forca e kombëtares së Julen Lopeteguit. Një rreshtim që ka rezultuar joefikas, sepse janë pësuar tre gola në pjesën e parë, brenda pak minutash.
Rikthimi te mbrojtja me katër ka sjellë më shumë siguri, në pjesën e dytë, edhe pse kjo duhet marrë me rezerva, sepse Spanja e uli ritmin dhe në njëfarë mënyre “mëshiroi”. Zakonisht, “shqiponjat” luajnë, në fakt, me titullarin e portës, Etrit Berisha, dhe para tij mbrojtja e përbërë nga katër lojtarë: pikërisht nga Mavraj dhe Arlind Ajeti i Crotones si qendrorë, “napolitani” Elseid Hysaj në të majtë dhe kapiteni Ansi Agolli majtas. Dy krahët e prapavijës kanë ofensivë të mirë në shtytje. Në mesfushë Panucci ka paradoksalisht shumë probleme, në sajë të kthimit të Taulant Xhakës (duke përjashtuar ndeshjet e e mëparshme me Lihtenshtejnin dhe Maqedoninë për arsye disiplinore) dhe Kukeli. Lojtari i Bazelit, sidoqoftë, nuk mund të luajë ndaj Italisë, sepse është i pezulluar për shkak kartonësh të verdhë. Ashtu si edhe Llullaku. Përveç tyre ekzistojnë dy “italianë”, Ledian Memushaj i Benevento dhe Migjen Basha i Barit. Këtë të fundit Gian Piero Ventura e njeh mirë, sepse e ka trajnuar në Torino. Në dispozicion për trajnerin Panucci është edhe Ergys Kaçe, i cili, çuditërisht, u pozicionua titullar kundër Spanjës.
Në sulm, në anën tjetër, Shqipëria ka talente si Armando Sadiku, golashënuesi 26-vjeçar, dhe Odise Roshi. Në ofensivë mund të luajë edhe 22-vjeçari Eros Grezda, titullar kundër Spanjës, i cili, gjithashtu, bën edhe anësorin e jashtëm. Pra, edhe në departamentin e ofensivës, zgjedhja nuk do të jetë e lehtë për ish-teknikun e Livornos. Megjithatë, përveç trajnerit dhe lojtarëve që kanë luajtur në Seria A dhe B, tashmë janë shtuar Frederic Veseli i Empolit, Berat Djimsiti i Beneventos dhe i lënduari Thomas Strakosha i Lazios. Duhet thënë se është një komb i tërë duke pritur për ndeshjen e parë zyrtare historike në shtëpi, kundër Italisë, ku presioni është mbi të gjitha mbi supet e bluve Gigi Buffon me shokë. Për Shqipërinë, megjithatë, mbetet ëndrra dhe mundësia për të mbrojtur dhe konsoliduar vendin e tretë në grup, sepse Izraeli, i katërti, një pikë larg, pret Spanjën në Jeruzalem dhe vështirë se të besuarit e Eliseu Levy marrin diçka.
Shkruan “Sportmediaset”
