Protestës së studentëve përpara Ministrisë së Arsimit i janë bashkuar banorë të Astirit, të cilët kanë më shumë se një muaj në protestë. Por, asgjë nuk ka shkuar mirë, teksa studentët kanë refuzuar bashkimin dhe solidarizimin e banorëve të Astirit me studentët.
Të pyetur përse ata i kundërshtojnë banorët e Astirit, studentët thonë: “Kauza jonë është jo politike. Ata nuk kishin përse të vinin me jelekë të veshur dhe si grup. Mund të na bashkoheshin më herët te korpusi i universiteti, jo kështu. Kauza jonë është e studentëve dhe do të mbetet e tillë, jo politike si ajo e banorëve”.
Një studente, banore e Astirit e cila gjendej pranë të atit ka shpërthyer në lot, teksa tha se ajo mbron të dyja kauzat. Ajo është studente dhe proteston për tarifat, por është edhe banore e Astirit.
Duket se edhe studentët janë të ndarë, teksa një prej tyre shprehet se është pro bashkimit të tyre në protestën e studentëve:
“Unë jam pro, mund t’i bashkohen studentëve. Edhe ata janë prindër, studentët që kundërshtojnë po nxitohen”.
“Ne kemi ardhur për fëmijët tanë. Jam prind i një studenti. Ku është politika këtu ? Kemi ardh si prindër për mbështetje. Ne protestën tonë e kemi pasdite, s’e kemi këtu. Ne jemi prindër, jemi paqësorë. Pronat i kemi lënë te Unaza”, tha një prind, banor i Unazës së Re i cili është refuzuar që t’i bashkohet protestës./ TIRANA TODAY
