Kampioni rus i UFC-së, Khabib Nurmagomedov është takuar me presidentin turk, Rexhep Tajip Erdogan. Ky i fundit është një nga personalitetet e profileve të larta të listës së kampionit për të takuar, pas fitores ndaj Conor McGregor.
“Shumë kënaqësi që ju takova”, shkroi 30-vjeçari, kampion i peshave të lehta në UFC, teksa postoi një foto ku shtrëngonte duart me liderin turk.
Bëhet e ditur se edhe i ati i Khabib po viziton Turqinë. Takimi i shkurtër me Erdogan është pasqyruar edhe në kanalin turk 24TV.
Së fundmi, Khabib është parë edhe në shoqërinë e presidentit rus Vladimir Putin, i cili e uroi atë për fitoren vetëm pak ditë pasi u kthye në vendlindje. Putin po ashtu i kërkoi të atit të Khabib që të mos e dënonte shumë ashpër të birin pas përleshjes jashtë kafazit.
Gjatë fundjavës, Khabib postoi një foto me sheikun e Emirateve të Bashkuara Arabe, Diab Bin Zayed Al Nahyan, ku shkroi: “Faleminderit shumë për mikpritjen. Shihemi së shpejti vëlla”.
Khabib Nurmagomedov pas fitores me Conor McGregor është duke programuar sërish rikthimin në kafaz. Ai kërkon që të zhvillojë një ndeshje të madhe që të mbahet mend dhe mesa duket është në rrugën e duhur duke parë kundërshtarin.
Pas disa tentativave për të zhvilluar një ndeshje boksi me Floyd Mayweather është rikthyer të përballja në MMA, aty ku ia lejon edhe kontrata që ka me UFC-në. Menaxheri i rusit njoftoi pak orë më parë se po projektohet një surprizë e madhe dhe shumë shpejt ka dalë në skenë emri i kundërshtarit të radhës së kampionit të peshave të lehta.
Ideja kryesore që po qarkullon tani është përballja me kanadezin St-Pierre, ish-kampion bote në peshat e lehta dhe ato të mesme, i njohur për aktivitetin e tij në artet marciale mikse. Tashmë ai është 37 vjeç dhe është i tërhequr nga sporti, por rikthimi i tij në kafaz është mëse i mundur edhe pse kanadezi ka një vit që nuk ndeshet./ TIRANA TODAY
