Kujtim Koxha, autor i vrasjes së trefishtë në Mat, ka tentuar t’i japë fund jetës. Ngjarja ka ndodhur në ambientet e burgut të sigurisë së lartë në Burrel, pas transferimit të Koxhës në këtë institucion. Pasi Gjykata e këtij rrethi vendosi masën e sigurisë “arrest me burg”.
Mësohet se ngjarja ka ndodhur mbrëmjen e së martës, por është mbajtur sekret. Një ditë pas krimit të kryer në fshatin Shëlli të zonës së Macukullit, 54-vjeçari ka shfaqur shenja pendese dhe çekuilibri mendor.
Ai tentoi vetëflijimin nëpërmjet telave të korrentit, teksa ka kërkuar të shkojë në tualet, raporton Panorama.
“Koxha kërkoi të shkonte në tualet. Zbatuam me korrektësi të gjitha rregullat gjatë lëvizjes së tij nga qelia për në tualet. Jam befasuar kur e pashë që kishte shtrënguar një tel korrenti. Thirra me zë të lartë “lëshoje”. E lëshoi dhe për fat të mirë nuk pësoi gjë. Lajmërova eprorët për ngjarjen. Pas ardhjes së elektricistëve mësova se Kujtim Koxha kishte prekur telin nul, jo fazën”, ka pohuar gardiani i Burrelit para eprorëve të tij teksa ka raportuar ngjarjen.
Gardianë të Burgut të Burrelit saktësojnë se që prej datës 15 tetor 2018, autori i masakrës së Shëlliut në Njësinë Administrative Macukull ka shfaqur shenja çrregullimi mendor.
Ai nuk flet me askënd, del shumë pak në ajrim, ushqehet shumë pak. Të afërmit nuk e kanë takuar, por kjo dyshohet për shkak të zonës së largët ku ndodhet e shoqja, pasi kjo e fundit pas ngjarjes deklaroi për “Panorama” se nuk do ta braktiste të shoqin, pavarësisht krimit të rëndë që ka ndodhur.
Ndërkaq, fëmijët e Koxhës mësohet se jetojnë jashtë vendit. Pas tentativës për t’u vetëvrarë, gardianët kanë shtuar masat e ruajtjes së tij. Për këtë ngjarje është njoftuar edhe Prokuroria e Rrethit Gjyqësor Mat, e cila ka nisur hetimet për zbardhjen e saj. Po hetohet nëse linja elektrike është lënë në atë gjendje për shkak të neglizhencës nga punonjësit e institucionit apo të dënuarit kanë realizuar nxjerrjen e telave të korrentit në sipërfaqe.
Po hetohet gjithashtu administrata e këtij institucioni për moszbatim të rregullave brenda mjediseve të burgut. Prokurori ka pyetur edhe Koxhën, por ai ashtu si edhe në Gjykatë nuk ka pranuar të flasë.
