Një 22-vjeçar është arrestuar në kushtet e flagrancës në aksin rrugor Elbasan-Peqin.
Shtetasi A.D, u kap në afërsi të fshatit Bradashesh, duke transportuar 13 sirianë, me një mjet të marrë me qera.
Ai u premtonte emigrantëve kalimin e kufirit, për në vendet e BE-së.
”Arrestimi i tij u bë pasi në aksin rrugor Elbasan-Peqin, në fshatin Bradashesh, Elbasan, u kap nga shërbimet e Policisë duke transportuar me një mjet të marrë me qira, 13 shtetas sirianë, për të kaluar kufirin, me destinacion vendet e BE-së’’, informon policia.
Në cilësinë e provës materiale u sekuestrua mjeti dhe dy aparate celular.
Operacioni i koduar ‘’Bradasheshi’’, u finalizua nga Sektori për Hetimin e Narkotikëve dhe Trafiqeve të Paligjshme në DVP Elbasan, në bashkëpunim me Komisariatin e Policisë Elbasan.
Materialet hetimore i kaluan Prokurorisë pranë Gjykatës së Shkallës së Parë Elbasan, për veprime të mëtejshme procedurale.
