Plani Aksional Lokal 2017-2021 po shihet nga përfaqësues politikë dhe të shoqërisë civile si rrezik për ndryshime demografike në Preshevë.
Ky plan parashikon rehabilitimin e emigrantëve nga Lindja e Mesme, por edhe të të zhvendosurve brenda territorit të ish-Jugosllavisë, që nënkupton edhe serbët e shpërngulur nga territori i Kosovës.
“Anëtarët e Këshillit tonë komunal e kanë lëshuar mbledhjen dhe nuk e kanë pranuar një gjë të tillë”, tha për televizionin publik, Ardita Sinani, kryetare e PVD-së në Preshevë.
Kryetari i PDSH-së në Preshevë, Ragmi Mustafa tha se ky dokument është përpiluar nga Aleksandër Vulin:
“Këto dokumente, në preambulën e saj edhe në kuadër të Planit të saj Aksional për kultivimin dhe mbledhjen e serbëve paramilitarë në territorin e Kosovës, e kanë përpiluar në kabinetin e ministrit për Punë Sociale vitin e kaluar Aleksandër Vulin”.
Belgzim Kamberi nga KMLDNJ thotë se Plani Aksional është miratuar nga Këshilli Komunal pa transparencë të mjaftueshme, ndërkohë që miratimit të tij është dashur që t’i prijë një diskutim i gjerë publik:
“Duke pasë parasysh çështjen e ndjeshme të këtij plani, i cili respektivisht mund të ndikojë edhe në përbërjen demografike të Komunës së Preshevës, një problem i parë është që ky plan është aprovuar vetëm nga ekzekutivi dhe nuk e ka përfillur ende Kuvendi komunal”, tha Kamberi.
