Mesfushori i kombëtares shqiptare, Eros Grezda thekson se do të japë gjithçka në fushë në ndeshjen ndaj Lihtenshtejnit.
22-vjeçari nga Gjakova nuk e ka fshehur dëshirën për t’u aktivizuar nga minuta e parë në sfidën e 2 shtatorit. Ndërsa u shpreh se për Kombëtaren është gati të luajë në çdo pozicion që e cakton trajneri.
Në konferencën për mediat, ku iu përgjigj interesimit të gazetarëve, Grezda vuri në dukje se Shqipëria shkon si favorite në këtë ndeshje.
Grezdës iu kërkua edhe një mendim mbi rastin e Cikalleshit i cili është pezulluar përkohësisht nga kombëtarja. Sipas tij, të gjithë duhet t’iu binden urdhrave të trajnerit dhe është Cristian Panucci ai i cili vendos të grumbullojë në skuadër e cilin jo.
Gjatë ndeshjeve me De Biazin jeni aktivizuar disa minuta, duke pasur pak mundësi për të treguar veten. A mendoni se ju duhet më shumë punë për të treguar veten në ato minuta që keni mundësi?
Për fat të keq nuk kam filluar asnjë ndeshje nga minuta e parë. Kam luajtur në Itali e Luksemburg. Nuk e di sa kam arritur t’i mbush mendjen trajnerëve, por unë gjithmonë kam dhënë maksimumin dhe tani pres që ndoshta të filloj nga minuta e parë dhe të tregoj veten”.
A ke të njëjtin besim që ke pasur nga De Biazi me trajnerin e ri? Ke folur me të?
Nuk kam biseduar shumë, kemi pak ditë që kemi ardhur dhe jemi të përqendruar te stërvitjet që po bëjmë. Trajneri do të provojë gjëra, do bëjë zgjedhjet. Ai do të shikojë cili është lojtari ideal për pozicionet ku luajmë”.
Me mungesën e Cikalleshit do të mbetet vetëm Sadiku në sulm. Panucci tha se do përshtatë edhe lojtarët e tjerë në pozicione që nuk i kanë luajtur. Ti preferon krahun e djathtë, por a do pranoje të luaje dhe në pozicione të tjera?
Për Kombëtaren duhet të luajnë në çdo pozicion, kudo që thotë trajneri. Për mua nuk është problem që luaj edhe sulmues, apo mesfushor pas sulmuesit. E rëndësishme është Kombëtarja dhe mundohemi të bëjmë më të mirën.
Çfarë mendoni për përjashtimin e Cikalleshit?
Nuk kam përgjigje se trajneri i zgjidh problemet me futbollistët. Ne jemi munduar të respektojmë rregullat e trajnerit dhe përsëri do të vazhdojmë ta bëjmë një gjë të tillë”.
Cila do të jetë diferenca mes De Biazit dhe Panuccit?
Luajmë me Lihtenshtejnin dhe jemi favoritë, duhet të sulmojmë. Mendoj se trajneri ka marrë më shumë lojtarë me tipare sulmuese dhe ne duhet të tregojmë veten për të luftuar për ato pozicione në fushë. Secili trajner ka taktikat e veta, si me De Biazin, ashtu edhe me Panuccin jemi të kënaqur dhe vazhdojmë punën tone”.
Para stërvitjes Panucci ju ka mbledhur dhe ju ka dhënë disa këshilla. A mund të zbuloni ndonjë prej tyre?
Na ka dhënë këshillat normale për çdo lojtar. Ai mundohet që të na tregojë ato që do të na japë të fushë.
Sa pikë shpreson të merrni nga këto ndeshje?
Së pari të mendojmë për Lihtenshtejnin, është shumë ndeshje e vështirë se ne letër është e fituar. Por kohët e fundit kemi parë që çdo Kombëtare po luan mirë. Shpresojmë të marrim tre pikët dhe të përqendrohemi më pas te Maqedonia.
E shihni veten si alternativë në sulm, pas mungesës së 3 sulmuesve kryesorë?
Kemi shumë lojtarë sulmues dhe besoj se secili nga ne është gati të mbulojë vendin e Cikalleshit, Balajt apo Sadikut. Kemi edhe disa ditë deri të shtunën dhe do të shohim si do të jetë situata, është shumë herët për të folur.
