Ndërron jetë në moshën 92-vjeçare Liri Belishova, një nga ish-drejtueset kryesore të partisë komuniste por që më pas u internua nga kjo parti deri në vitin 1991.
Liri Belishova ka qenë anëtare e Byrosë Politike dhe e Komitetit Qendror të PPSH-së ka qenë një nga drejtueset kryesore të Partisë Komuniste që nga vitet e para të krijimit të
Lindi në Belishovë të krahinës së Mallakastrës më 14 tetor 1926 në një familje të kamur të zonës, e bija e Kamber Belishovës, përfaqësues i krahinës në Kongresin e Durrësit. Shkollën fillore pesëvjeçare e mbaroi më 1937 në Ballsh. Më 1938 fitoi bursë që të ndiqte studimet në Institutin “Nana Mbretneshë” në kryeqytetin e mbretërisë. Kontaktet me idetë dhe materialet komuniste i pati prej kushëririt të saj, Besimit, student në Normalen e Elbasanit.
Që adoleshente në luftë humbi syrin, ndërsa pas lufte humbi titujt që mori, humbi vajzën Drita, por edhe dy bashkëshortë, Nako Spiron e Maqo Çomon. Humbi 31 vite jetë në internim dhe plot miq të saj. E arsimuar edhe në Bashkimin Sovjetik, nga njëra prej eksponentëve kryesore të LANÇ-it, anëtare e Byrosë Politike dhe e Komitetit Qendror të PPSH-së, ajo u përjashtua në vitin 1960 si “armike e Partisë”, duke e internuar fillimisht në Gjirokastër dhe më pas në Cërrik e Mallakastër, deri në vitin 1991.
Dy vite më parë në ditëlindjen e 90-të, Liri Belishova do të shprehej: Jeta ime ka qenë e mjegullt po jam e lumtur që e përjetova lirinë e demokracinë e Shqipërisë dhe Kosovës. Më bëhet qejfi që Shqipëria po ndjek rrugën europiane”. Ditëlindja e 90-të u festua në Akademinë e Shkencave, ku nga të pranishmit u cilësua si diplomate kalibri, veçse intelektuale.
Ish-presidenti Alfred Moisiu, demokratja Grida Duma, deputetja kosovare Flora Brovina, aktorët Tinka Kurti e Margarita Xhepa, gazetarja Tefta Radi, ish-gjenerali Rrahman Parllaku vlerësuan kontributin në luftë të Belishovës, mandej kontributin në diplomaci, duke mos lënë pa përmendur edhe jetën e saj të vështirë në internim.
“Është e vetmja që ka kërkuar falje që ka punuar me Enverin. Asnjë tjetër nuk ka moral ta bëjë këtë”, u shpreh atë kohë aktorja e madhe Raimonda Bulku, e cila kishte qenë shoqe me vajzën e Belishovës, Drita Çomo.
