Presidenti i Republikës, Ilir Meta vlerësoi me Dekoratën e lartë “Nderi i Kombit” Ansamblin Popullor, si dhe çmoi me Dekoratën “Nderi i Kombit” kërcimtarin dhe mjeshtrin e valles popullore Besim Zekthi.
Këto nderime janë dhënë me rastin e 60 vjetorit të krijimit të Ansamblit si dhe për promovimin denjësisht të vlerave të mirëfillta të trashëgimisë sonë kulturore jashtë vendit.
“Ansambli Kombëtar i Këngëve dhe Valleve Popullore prej shumë kohësh është kthyer në një vatër të pashtershme e cila, e frymëzuar nga gurra popullore, ka përpunuar dhe ekzekutuar me cilësi të larta artistike e muzikore motivet e këtij thesari të madh, që populli ynë e transmeton me besnikëri brez pas brezi,” u shpreh Meta gjatë ceremonisë.
Duke veçuar mes të tjerëve legjendën e Valles Popullore Shqiptare, Besim Zekthin, Presidenti Meta vlerësoi me dekoratën e lartë “Nderi i Kombit” valltarin dhe koreografin e shquar.
“Të gjithë ne i kemi të ngulitura në kujtesën tonë interpretimet e tua mahnitëse të “Valles së Shqipeve” apo ‘Festë të madhe ka sot Shqipëria’, kur vrulli i brendshëm të jepte krahë dhe të bënte të fluturoje pa u ndalur porsi një shqipe krenare. Talenti i rrallë dhe mjeshtëria jote virtuoze interpretuese kanë qenë dhe mbeten jo vetëm shfaqje artistike të jashtëzakonshme, por edhe burim i pashtershëm frymëzimi për brezat e rinj të artistëve dhe valltarëve shqiptarë, dhe jo vetëm,” tha Presidenti Meta.
