Ndahet nga jeta gazetari i njohur Ganimet Klaiqi pas një sëmundjeje të rëndë.
I ndjeri ka punuar prej vitesh në të përditshmen “Koha Ditorë”, si dhe jepte mësim në Universitetin e Prishtinës.
Klaiqi ka lindur më 26 janar 1965 në Poliçkë të Kamenicës, shkollën fillore e ka mbaruar në vendlindje, të mesmen në Dardanë, ndërsa fakultetin dhe studimet Master i ka mbaruar në Universitetin e Prishtinës “Hasan Prishtina”.
Gjatë vitit 1993-1994, Klaiqi ka punuar si mësues i Gjuhës dhe letërsisë shqipe, në shkollën fillore “Abdullah Krashnica” në Preshevë, ndërsa më 1997 nisi të punojë si korrespondent në të përditshmen “Koha Ditore”.
Pas përfundimit të luftës, në institucionet e përkohshme ka punuar një vit si shef i Zyrës së Informacionit në Kamenicë. Gjatë kësaj kohe ka shkruar prozë e poezi. Në vitin 2000 i është rikthyer gazetarisë, ku ka vazhduar deri më 2015.
Më poshtë postimi i tij i fundit në profilin e tij të Facebookut:
“Të nderuar miq, profesorë, gazetarë, familjarët e mi të dashur, vëllezër e motra, që më rrini pranë në këto ditë të vështira për shërimin tim.
Lajmet nga shoqnia po vinë si bombë e kurdisur, pa rrugëdalje, për shkak të mendësisë del të jetë primitive, sepse sulmet ndaj mendimit të lirë janë sulme ndaj vetë historisë njerëzore. Edhe në organizimet më të vjetra liria e shprehjes ishte dhe mbeti boshtë i demokracise. Mos i sulmoni gazetarët per bindjen e lirë, ata mund të jenë shtyllat që i japin hov luftës kundër korrupcionit dhe krimit të organizuar! Janë tanët dhe ashtu i duam!!”.
