Kreu i Partisë Demokristiane Nard Ndoka zbulon ngjarjet që po zhvillohen në prapaskenë për arritjen e një marrëveshje midis mazhorancës dhe opozitës me synim krijimin e qeverisë teknike, që do të çonte palët politike drejt zgjedhjeve të 18 qershorit.
Në një prononcim ekskluziv për Tirana Today, Ndoka vë në dukje se midis mazhorancës dhe opozitës janë duke u zhvilluar bisedime, por deri më tani palët nuk kanë arritur në një pikëtakim midis tyre.
Gjithashtu, edhe burimet pranë Partisë Demokratike e pranojnë se po negociohet në këtë drejtim por kanë qenë të rezervuar për të dhënë detaje. Ndërsa përfaqësues të qeverisë të kontaktuar nga Tirana Today, e mohojnë që të ketë bisedime në rrugë informale midis mazhorancës dhe opozitës.
Ai thekson se beson se me bisedimet, që po vijojnë midis dy kampeve politike, do të prodhojnë një marrëveshje që do të ulte në tryezë kryeministrin Edi Rama dhe kreun e Partisë Demokratike, Lulzim Basha.
Sipas Ndokës, nëse do të arrihet një marrëveshje e tillë, nga ana e gjithë aleatëve opozitarë do të ketë një vendimarrje të përbashkët për të vendosur edhe për formatin e takimit me kryeministrin Rama.
Ky takim do të hapte rrugën e zgjidhjes së krizës politike në vend për të shkuar në zgjedhjet parlamentare të 18 qershorit nën drejtimin e një qeverie teknike.
Orest Çipa/Tirana Today