Napoli ka zhgënjyer përballë vendit të fundit në Serie A, ku përballë Chievos nuk ka arritur të marrë më shumë se një barazim pa gola. “Axurrët” janë kthyer në vendin e dytë të renditjes, por kanë humbur terren ndaj Juventus-it kryesues që tani ndodhet tetë pikë larg. Rastet për gol nuk i kanë munguar vendasve, me Mertens dhe Callejon që janë treguar të pasaktë para portës. Ndërsa rasti më i mirë ishte i Insigne, i cili u ndal vetëm nga shtylla.
Spektakël ka qenë përballja e kuqezinjve në kampionatin italian, ku Veseli me Empolin ka mposhtur në sekondat e fundit Atalantën e Gjimshitit dhe Berishës me rezultatin 3-2. Një sukses që i ka shpëtuar nga duart në minutat e fundit.
Bergamaskët, në fakt, kanë kaluar në avantazh në minutën e 33-të me Freuler dhe kanë dyfishuar në të 40-ën me Hateboer pasi Caputo ka humbur një penallti për vendasit, që gjithsesi kanë ngushtuar shifrat në 2-1 tri minuta para fundit të pjesës së parë me La Gumina. Në të 77-ën ka ardhur edhe goli i barazimit falë një autogoli të Masiello-s.
Në minutën e 84-t Atalanta ka mbetur me 10 lojtarë pas kartonit të kuq të marrë nga Ilicic dhe Empoli ka arritur të përfitojë nga superioriteti numerik duke shënuar golin e fitores 3-2 me Silvestre në minutën e 92-të.
Është mbyllur në barazim pa gola edhe Bologna-Fiorentina, ndërsa Parma ka mundur 2-1 Frosinone-n dhe është ngjitur në vendin e gjashtë të renditjes.
