Pas ngjarjes së rëndë në Pittsburgh të Pensilvanisë, myslimanët amerikane kanë dhënë një shembull tejet fisnik.
Ata kanë mbledhur më shumë se 120 mijë dollarë për familjet e viktimave dhe të plagosurve në ngjarjen e rëndë që ndodhi në sinagogën e Pittsburghut. Ata ndërmorën këtë akt fisnik, në shenjë solidariteti dhe për të treguar se të gjithë jemi njerëz, pavarësish se cilit besim fetar i përkasim.
“CelebrateMercy” dhe “MPowerChange”, organizata muslimane jo-qeveritare, nisën mbledhjen e fondeve pak orë pas masakrës, ku mbetën 11 të vrarë dhe u plagosën 6 të tjerë. Në vetëm 6 orë u mblodhën 25 mijë dollarë.
“Duam t’i përgjigjemi të keqes me mirësi, ashtu siç besimi ynë islamik na ka mësuar, duke dërguar një mesazh të fuqishëm keqardhjeje për komunitetin hebre”, tha Tarek El-Messidi, drejtor i CelebrateMercy.
“Nëpërmjet kësaj fushate, shpresojmë të dërgojmë një mesazh të bashkuar për komunitetet hebre dhe myslimane, që nuk ka vend për urrejtje dhe dhunë në Amerikë dhe askund tjetër”.
Qendra Islamike e Pittsburgut do të ndihmojë me këto fonde familjet e prekura, duke ndihmuar kryesisht me nevoja të tilla, si shpenzimet funerale apo medikamente për të plagosurit.
