Ylli Gurra trondit Komunitetin Mysliman para zgjedhjeve, platforma e tij është transparenca, lufta kundër tentakulave të cilat kanë shtrirë dorë brenda komunitetit dhe frymëve që e trajtojnë atë si shoqatë dhe jo si bashkësi e të gjithë shqiptarëve. Ai po kandidon vetëm për të mbështetur klerikët e komunitetit që janë shtresa më e varfër dhe e përbuzur.
Gurra 2 ditë para zgjedhjeve të Komunitetit Musliman, ku kandidon edhe për ta drejtuar atë për 5 vitet e ardhshme ka lënë të kuptohet se jo gjithçka funksionon si duhet në kryesinë e komunitetit. Gjithashtu theksoi se ata duhet të jenë të pavarur si drita e diellit dhe të mos jenë të kapur nga asnjë tentakulë.
Në zgjedhjet e së shtunës Gurra ka kërkuar edhe praninë e mediave për të pasur transparencë të plotë.
“Komuniteti Mysliman i Shqipërisë nuk duhet të jetë asnjëherë, në asnjë kohë dhe nga askush, faktorë dhe aktorë të brendshëm apo të jashtëm, i kapur. E them së pari për ata që janë drejtëprëdrejtë përgjegjës, edhe si unë që jam myftiu i Tiranës, që duhet të jetë i pavarur si drita e diellit nga çdo indoktrinim, nga çdo kapje, çdo pretendim, çdo tentakule e kujdo qoftë. Myslimanët janë dhe duhet të jenë në gjendje të drejtojnë jo vetëm vetëveten por jemi të detyruar të japim shembullin tonë sepse këtë barrë historike e kemi marrë me vetëdije. Ndaj për hir të kësaj barre transparenca të jetë e madhe, e për këtë arsye janë të ftuara edhe mediat.
Natyrisht të gjithë myftinjtë që plotësojnë dokumentacionin përkatës kanë të drejtë që të kandidojnë. Por kandidatura duhet të bëhet në një kohë të caktuar dhe të verifikohet dokumentacioni përkatës. Dallgët e tranzicionit pas 90’ kanë ndikuar edhe te myslimanët, pasi ne nuk jemi ndryshe të zbritur nga qielli”, u shpreh Gurra.
I ftuar në Ora News, Ylli Gurra pyetjes se çfarë islami ka sot Shqipëria i dha këtë përgjigje:
Ne nuk kemi ndonjë Urdhër, as ndonjë diktim nga Kushtetuta që ne të importojmë detyrimisht për të qenë besimtarë. Këta njerëz bashkë me mua kanë shekuj këtu që kanë lidhur një besë me Zotin përmes fesë islame. Ne jemi dhe duhet të mbetemi europianë. Islami është islami tradicional që bashkëjeton shumë lirshëm, drejtpërdrejtë, pa hipokrizi me besimtarët e religjioneve të tjera.
