Kryeministri i Kosovës dhe kryetari i LDK-së, Isa Mustafa, në lidhje mocionin e dërguar në Kuvend për rrëzimin e Qeverisë së Kosovës, tha se me partnerin qeveritar kanë një marrëveshje për bashkëqeverisje, ndërsa vlerësoi se Qeverinë po tentojnë ta rrëzojnë ata që kanë probleme me ligjin.
“Nuk jam fare i shqetësuar për këtë. Ajo çfarë kam parë unë deri më tani, kam vërejtur se rrëzimin e Qeverisë e kërkojnë të gjithë ata që kanë probleme me ligjin, ata që në të kaluarën kanë shkelur ligjin, që me korrupsion me krim të organizuar dhe forma të tjera”, tha kryeministri Mustafa në një prononcim për RTK.
Ai po ashtu tha se me partnerin qeveritar kanë një partneritet të lidhur me dëshirë dhe po ashtu kanë një kontratë që i përcakton detyrimet e të dy palëve.
“E kemi një marrëveshje që asnjëra palë nuk do t’i bashkëngjitët opozitës dhe nëse një palë vepron njëanshëm, është çështje tjetër, por unë këtë nuk dua ta paragjykojë”, tha Mustafa.
