Kryetari i Këshillit Nacional të Shqiptarëve në Luginën e Preshevës, Ragmi Mustafa ka folur hapur për bashkimin e Luginës së Preshevës me Kosovën.
Mustafa e cilëson këtë si kohën më të përshtatshme për të bërë një bashkim të tillë.
Duke folur për gazetën zvicerane, ‘LeTemps’, Mustafa ka thënë se marrëveshja mes Kosovës dhe Serbisë duhet të sigurojë zhvillim ekonomik dhe integrim të shqiptarëve, mirëpo sipas tij një gjë e tillë është vështirë e arritshme.
“Marrëveshjet e paqes që u arritën tentuan sigurimin e paqes, zhvillimit ekonomik, dhe integrimit politik të shqiptarëve, mirëpo asnjëra nga këto nuk erdhi. Sot ne kemi shansin historike që të bashkohemi me Kosovën”, tha Mustafa.
Megjithatë, Mustafa është skeptik se Beogradi do të lëshojë pe për të gjithë Luginën e Preshevës, territor ky me rëndësi strategjike për Serbinë.
Ideja e bashkimit të Luginës së Preshevës me Kosovën ishte vënë fillimisht në tavolinë nga presidenti i Kosovës, Hashim Thaçi në atë që ai e quante korrigjim të kufirit. Kjo ide nuk është mbështetur nga opozita, që vazhdimisht ka theksuar se kjo nuk do ishte gjë tjetër veçse shkëmbim territoresh.
