Qeveria italiane ofron bursa studimi për të rinjtë dhe diplomuarit shqiptarë sa i takon vitit akademik 2017-2018.
Periudha e përftimit të bursës përkon me kohëzgjatjen e vitit shkollor 2017-2018, pra nga data 1 nëntor 2017 deri në datën 30 shtator 2018. Ndërkohë bursat e studimit do të paguhen vetëm duke filluar mbas datës 1 janar 2018.
Studimet përkatëse me bursë mund të kryhen pranë universiteteve, instituteve të formimit të lartë artistik e muzikor, instituteve të restaurimit, shkollave kombëtare të kinematografisë, qendrave e laboratorëve kërkimore, bibliotekave, arkivave, muzeve dhe institucioneve të tjera shtetërore.
Nuk do të jepen bursa për kryerjen e studimeve pranë institucioneve të huaja, edhe pse të vendosura në Itali, apo në shkolla dhe laboratorë private, të cilat nuk janë të njohura nga institucionet shtetërore.
Lidhur me procedurat e paraqitjes së kërkesës për bursë studimi nga ana e kandidatëve, këta të fundit duhet të plotësojnë formularin interaktiv në faqen e internetit të Ministrisë së Punëve të Jashtme dhe të Bashkëpunimit Ndërkombëtar të Republikës së Italisë: http://borseonline.esteri.it/borseonline.
Ndërsa Ministria e Arsimit dhe Sportit ka publikuar në faqen zyrtare, procedurën e plotë të aplikimit dhe dokumentacionin e kërkuar.
