Për të gjithë ata që akoma nuk kanë konkurruar për të ndjekur studimet universitare qeveria ofroi një mundësi të dytë. Të gjithë ata që kanë dëshirë të ndjekin studimet universitare janë në dispozicion datat 4, 5 dhe 6 shtator që të të aplikojnë për të konkurruar në universitet me degët që kanë akoma vende vakante. Por edhe ata kandidatë që janë në proces konkurrimi dhe nuk kanë fituar asnjë degë në raundin e parë nuk duhet të humbasin shpresat sepse ka raunde të tjera.
Të gjithë ata kandidatë që kanë mbaruar shkollën e mesme para vitit 2017 dhe që nuk kanë dhënë provimet e Maturës, por që duan të aplikojnë në Institucionet e Arsimit të Lartë duhet të plotësojnë formularin A1Z për t’u përfshirë në këtë proces.
Procedurat kanë nisur që prej ditës së sotme për të vijuar nesër dhe të mërkurën, konkretisht më datat 5-6 Shtator.
Në një njoftim të Agjencisë Kombëtare të Provimeve thuhet se duhet të plotësojnë këtë formular edhe kandidatët që kanë përfunduar shkollën e mesme jashtë vendit dhe kanë të njehsuar dokumentet shkollore nga MAS.
“Në datat 4-5-6 shtator 2017 do të jetë i hapur sistemi i Matura Online për aplikimet me formularin A1Z. Sistemi do jetë i hapur nga ora 8.00-16.00 të secilës nga datat e sipërpërmendura. Aplikimet me formularin A1Z bëhen në mjediset e shkollave ku kandidatët kanë përfunduar shkollën e mesme. Për të gjitha rastet që do të paraqiten pranë shkollave për aplikim do të ndiqen procedurat e përcaktuara në udhëzimin përkatës. Kujdes, do të plotësojnë formularin A1Z vetëm kandidatët që nuk e kanë plotësuar këtë “Formular” në sesionin e parë apo të dytë të Maturës Shtetërore 2017”, thuhet në njoftimin e AKP-së.
Kandidatët që duhet të plotësojnë formularin
Kandidatët që mund të plotësojnë këtë formular do të jenë:
-Kandidatët që kanë përfunduar shkollën e mesme përpara vitit 2017 dhe nuk kanë për të dhënë provime të Maturës, por duan të aplikojnë në IAL.
-Kandidatët që kanë përfunduar shkollën e mesme jashtë vendit dhe kanë të njehsuar dokumentet shkollore nga MAS.
