Të hënën në mëngjes, përpara shkollës së mesme Arago në Francë, një mësuese kishte lexuar një letër që i kishte dërguar Amarilda. Ajo është një vajzë 16-vjeçare shqiptare, e cila me datë 25 tetor u dëbua bashkë me familjen për në Shqipëri.
Mësuesja Abdelillah Mniai u kishte lexuar letrën shokëve të saj dhe u tha se Amarilda Mita nuk do të vijojë më studimet në atë shkollë. Ajo ishte një nxënëse e shkëlqyer dhe dinte 5 gjuhë.
Pas mohimit të kërkesë për azil, ajo u dëbua në vendin e origjinës me prindërit e saj dhe vëllain e saj 10-vjeçar, raporton lindependant.fr.
“Unë absolutisht dëshiroja t’iu informoja për ata. Sot, në klasë, kemi një karrige boshe, jo sepse nxënësja është e sëmurë, por sepse familja e saj është dëbuar”, Abdelillah Mniai.
Në letrën e saj, që ia kishte dërguar mësueses në WhatsApp, Amarilda rrëfen për dëbimin e saj. Ajo i tregon për rrezikun që e pret atë dhe babanë e saj në Shqipëri.
Familja kishte vendosur të largohej nga vendi, sepse babai i Amarildës kishte qenë në shënjestër të mafies. Mafia kishte tentuar ta vriste. Shkak ishte bërë fakti se ai kishte ndërhyrë për të mbrojtur vajzën e tij pasi mafia e përndiqte që kur ajo ishte ende e vogël.
Amarilda shpjegon se që nga kthimi i saj në Shqipëri, ajo është detyruar të rrijë mbyllur. “Nuk mund të shkoj kudo, jam e frikësuar sepse mendoj se mund të më rrëmbejnë nga momenti në moment. Ata mund të rrëmbejnë babanë tim dhe mund ta vrasin…. Dua të kthehem në Francë dhe të vazhdoj shkollimin si më parë, sepse në Francë, ndihem e mbrojtur… “. /Përshtati: TIRANA TODAY/
