José Mourinho vazhdon të jetë një figurë që ndan mendimet e opinionit publik. Trajneri i Fenerbahçes është rikthyer sërish në qendër të vëmendjes me deklaratat e tij të forta dhe të drejtpërdrejta, duke mbrojtur madhështinë e karrierës së tij dhe duke relativizuar kritikat që i janë bërë ndër vite.
Në një intervistë për mediat braziliane, “Special One” theksoi se jo të gjitha sukseset kanë të njëjtën vlerë.
“Të fitosh Champions-in me Porton nuk është njësoj si ta fitosh me Barcelonën, ashtu si të fitosh me Interin nuk është njësoj si me Real Madridin,” u shpreh portugezi, duke nënvizuar vështirësinë e triumfeve të tij.
Mourinho foli edhe për periudhën e Real Madridit, ku nuk arriti dot të fitojë Champions-in, por siguroi La Ligan dhe Kupën e Mbretit. Ai kujtoi me krenari se ka qenë trajneri që “i dha fund ciklit të dominimit të Barcelonës së Guardiolës, asaj që ishte skuadra më e mirë në botë në atë kohë”.
Me fjalët e tij, Mourinho dëshiron të riafirmojë se arritjet e tij nuk duhet krahasuar vetëm me numrin e trofeve, por me peshën dhe vështirësinë që secila prej tyre ka pasur në kontekstin historik të futbollit.
