Manchester United ka bërë një përmbysje të madhe nga e cila pret edhe të vijë kthesa e madhe për këtë sezon të nisur si ‘mos më keq’. Një ndeshje e nisur në humbje 2-0 ndaj Newcastle u përmbys nga minuta e 70’ e mbrapa nga “Djajtë e Kuq”. Të besuarit Jose Mourinhos duket se kanë bërë një betim në fundin e pjesës së parë dhe më pas kanë zbritur në fushë me një qëllim të vetë.
Pas përmbysjes së “çmendur” ka folur edhe tekniku portugez, i cili ka treguar se çfarë iu ka rrëfyer lojtarëve në pushimin mes pjesëve. Në fund ai kujton edhe një bisedë me mikun e tij, ndërsa Mourinho duket tashmë se ka shpëtuar nga shkarkimi i postit si trajner.
“Ndryshimin nuk e bënë zëvendësimet, por mentaliteti, dëshira dhe vendosmëria. Askush nuk është i rëndësishëm më shumë se klubi. Jam 55 vjeç dhe është hera e parë që shoh këtë gjueti për të më hequr qafe. Unë mund të jetoj me këtë, disa lojtarë jo. Rashford dukej i mërzitur në fushë, McTominai ishte i frikësuar. Gabimet që ata bënë nuk janë normale.
Në pushim i premtuam njëri-tjetrit se do të jepnim gjithçka. Një profesionist nuk mund të premtoj se do të fitojë, por se do të jap gjithçka në fushë. Futbollistët luajnë për klubin. Një miku im sot po më thoshte se nëse nesër bie shi në Londër është faji im, nëse ka probleme me “Breksit”, atëherë është prapë faji im”, tha Mourinho.
