Organizata për të drejtat e njeriut ka kritikuar Kombet e Bashkuara, teksa tha se kjo e fundit ka minuar aftësitë e veta për t’iu bërë presion qeverive për shkelje të të drejtave të njeriut.
Ky reagim vjen pas raportimit të gazetës “Times” se shefi i OKB-së, Antonio Guterres, ka organizuar një takim të nivelit të lartë, në të cilin Zyra e Çështjeve Ligjore e OKB-së ka rekomanduar të mos pranojë përgjegjësinë apo të mos paguajë kompensim për qindra familje të pakicave etnike në Kosovë. Bëhet fjalë për familjet që kanë qenë të ekspozuara ndaj plumbit toksik, pasi janë detyruar të jetojnë në kampe të misionit të OKB-së – UNMIK, pas luftës së viteve 1998-1999.
Stephane Dujarric, zëdhënës i OKB-së, tha për “Times”se diskutimet po vazhdojnë dhe se Guterres do të marrë vendimin përfundimtar shumë shpejt.
Para një viti, përfaqësuesi special i sekretarit të përgjithshëm të OKB-së në Kosovë, Zahir Tanin, shprehu keqardhjen e tij, në lidhje me trajtimin e personave të zhvendosur të komunitetit rom, në dy kampet në veri të Kosovës.
Tanin tha se i ka marrë parasysh rekomandimet e Panelit për të Drejtat e Njeriut për dështimin e UNMIK-ut në trajtimin e personave të zhvendosur, bashkë me kërkesën për kompensim ndaj këtyre banorëve.
Kërkesën për kompensim, Tanin ka vendosur t’ua procedojë organeve kompetente të Kombeve të Bashkuara.
