Dy inspektorë tatimorë në Fier kanë rënë në pranga, pasi akuzohen për korrupsion. Të arrestuarit janë Florjan Zhaka, 35 vjeç, dhe Asqeri Tahiraj, 55 vjeç, të dy banues në Fier, të cilët u ndaluan nga uniformat blu pasi dyshohet se morën 7 mijë euro ryshfet nga një biznes.
Pas një pune hetimore 2-mujore të ndjekur me metodat speciale të hetimit, Specialistët e Sektorit për Hetimin e Krimit Ekonomik e Financiar në Drejtorinë Vendore të Policisë Fier, bënë të mundur ndalimin e tyre në kuadër të operacionit policor të koduar “Inspektori”.
“U bë ndalimi i shtetasve:
– Florjan Zhaka, 35 vjeç, banues në Fier, me detyrë përgjegjës i zyrës, analizës dhe informacionit në Drejtorinë Rajonale Tatimore Fier;
– Asqeri Tahiraj, 55 vjeç, banues në Fier, me detyrë Inspektor Zbatimi pranë Hetimit Tatimor në Drejtorinë e Tatimeve Fier.
Ndalimi i tyre u bë pasi duke qenë me detyrë Inspektor Tatimor, i kanë kërkuar dhe marrë 7 mijë euro rryshfet një subjekti tregtar me qëllim shmangien e sanksioneve tatimore”, thuhet në njoftimin e policisë.
Materialet i kaluan Prokurorisë pranë Gjykatës së Shkallës së Parë Fier për veprën penale “Korrupsion pasiv” e kryer në bashkëpunim.
