Sot po zhvillon punimet Këshilli i Ministrave të Jashtëm të Bashkimit Evropian. Në agjendë të diskutimit është edhe Ballkani Perëndimor, më konkretisht problemet e fundit midis Kosovës dhe Serbisë. Në të njëjtën kohë do të flitet edhe për Iranin dhe krizën në Detin Azov. Në një komunikim për gazetën “Shekulli”, zëdhënësja e Përfaqësueses së Lartë të Bashkimit Evropian, Maja Koçijançiç, tha se në orën 15:30 do jetë edhe konferenca për shtyp mbi rezultatet e takimit të Këshillit të Ministrave të Jashtëm të Bashkimit Evropian.
Fjala e Përfaqësueses së Lartë të Bashkimit Evropian, Federica Mogherini në hapje të takimit të Këshillit të Ministrave të Jashtëm:
“Sot do të kemi një ditë shumë të ngjeshur, bashkë me Ministrat e Jashtëm të Bashkimit Evropian. Para së gjithash, ne do të shënojmë një përvjetor shumë të rëndësishëm, që për ne është gjithashtu shumë e rëndësishme dhe do të kemi një deklaratë politike: Sot kemi 70 vjetorin e Deklaratës Universale të të Drejtave të Njeriut. Ne e festuam vetëm disa javë më parë me Presidentin e Parlamentit Evropian, Antonio Tajani dhe Michelle Bachelet, Komisioneri i Lartë i Kombeve të Bashkuara për të Drejtat e Njeriut dhe ata e dinë – e gjithë bota e di – se ata mund të mbështeten tek Bashkimin Evropian i cili është mbështetësi më i fortë për të drejtat e njeriut në botë. Ne e dimë se kemi disa punë për të bërë edhe brenda Unionit dhe do të vazhdojmë të punojmë për shumë probleme, në një kohë rekord.
Agjenda e sotme e takimi të Këshillit të Ministrave të Jashtëm të Bashkimit Evropian mbulon të gjithë botën. Në thelb problemet kryesore dhe primare që do të diskutojmë sot janë: Venezuela dhe Irani, Ballkani Perëndimor dhe marrëdhëniet tona me Bashkimin Afrikan. Ne do të presim në një drekë pune Ministrin e Jashtëm të Ukrainës, Pavlo Klimkin, të cilin e takova vetëm pak ditë më parë, për të diskutuar zhvillimet e fundit në Detin e Azov, por gjithashtu dhe kryesisht mbështetjen e Bashkimit Evropian ndaj Ukrainës, popullit ukrainas, dhe integritetit territorial të vendit. Ne gjithashtu do të miratojmë konkluzionet e Këshillit, të cilat janë shumë të rëndësishme – unë përmenda vetëm ato në Libi – kështu që do ti shihni rezultatet e kësaj dite pune më vonë gjatë pasdites”, përfundon fjalën e saj Federica Mogherini.
