Drejtorit të Hekurudhave, Ani Dyrmishit dyshohet se i është vendosur lëndë eksplozive. Një shishe e cila dyshohet se ishte e mbushur me lëndë eksplozive është gjendur pranë vendit ku ishte parkuar makina e Dyrmishit. Ai e kishte parkuar automjetin në lagjen nr.4 të Durrësit. Pranë mjetit raportohet se është gjendur edhe një telefon celular.
Në momentin e gjetjes së shishes, makina e drejtorit të Hekurudhave nuk gjendej aty. Supozohet se ajo ka qenë e vendosur në makinë, poshtë vendit të shoferit.
Mësohet se lënda plasëse është venduar gjatë natës në makinë, por fatmirësisht nuk ka të lënduar.
Përpara se të vendosej në dhjetor të 2017-s në postin e drejtorit të Hekurudhave, Ani Dyrmishi ishte ish-drejtori i Hipotekës në Durrës. Në një listë të kryeministrit Edi Rama në korrik të 2017-s, Dyrmishi rezultonte midis 100 zyrtarëve më të korruptuar. Lista “e zezë” përmbante kryesisht emrat për të cilët qytetarët ankoheshin vazhdimisht. Megjithatë, deputetët socialistë më datë 18 korrik të këtij viti i dolën në krah, duke argumentuar se duhet bërë kujdes në referimin e informacioneve.
