Komisioni i Edukimit dhe Mjeteve të Informimi Publik miratoi sot projektligjin për Akademinë e Shkencave, përmes të cilit i kryetarit i lejohet një mandat i dytë dhe i hiqet kufizimi i moshës 75 vjeç.
Mbledhja u drejtua nga nënkryetari socialist Petro Koçi dhe me pjesëmarrjen e 10 deputetëve nga të cilët 2 deputetë abstenuan, projektligji u miratua.
Pasi deptuetët socialistë miratuan këtë ndryshim në projektligj, deputetja e Partisë Demokratike Ina Zhupa tha se mbledhja është bërë në shkelje të rregullave dhe asnjë nga deputetët demokratë nuk ishte njoftuar lidhur me këtë mbledhje që do të mbahej.
“Nuk ka një shkresë të protokolluar, të gjithë deputetët duhet të njoftohen nga stafi i Kuvendit, dhe mua nuk më ka njoftuar asnjë. Nuk mund të bësh mbledhje klandestine. Kishin marrë 4 deputetë zëvendësues mosha mesatare mbi 75 vjeç, në të njëjtën linjë me ndryshimet që duan t’i bëjnë Skënder Gjinushit. Ky parlament sot ka një njollë turpi”, tha ajo.
Menjëherë pas deklaratës së Zhupës erdhi edhe reagimi i Akadamisë së Shkencave të cilët theksuan se shumica vendosi me votë dhe nuk është nevoja për “ puçe”, teksa më tej shton se puçet bëhen nga pakicat e dhunshme, duke shkelur parimet bazë të demokracisë.
“Miratohet në komision vullneti i shprehur nga 53 anëtarë të Asamblesë, me vendimmarrjen e saj të datës 5 korrik 2023 dhe opinionin mbështetës të datës 7 korrik. Dështon bllokimi i paligjshëm i procedurës nga kryetarja e komisionit për të mos lejuar votimin. Shumica vendos me votë dhe nuk ka nevojë për puçe. Puçe bëhen nga pakicat e dhunshme, duke shkelur parimet bazë të demokracisë. Asambleja e Akademisë së Shkencave i përcakton vetë rregullat e funksionimit të saj, nëpërmjet Ligjit dhe Statutit të saj. Organet drejtuese të ASHSH i zgjedh Asambleja me votë, jo ligji. Ndërhyrje politike është bllokimi i vullnetit të Asamblesë, jo votimi e mbështetja e tij”, thuhet në reagimin e Akademisë së Shkencave.
