Qeveria në largim e Kosovës ka miratuar Pakon Fiskale të quajtur 2.0, me të cilën synon që të lehtësojë ndjeshëm bizneset dhe të fuqizojë sektorin privat si shtyllë kryesore e zhvillimit ekonomik.
Kështu, autoritetet në Kosovë synojnë që prodhuesit vendorë të jenë të barabartë me ata të vendeve të rajonit.
Pakoja Fiskale 2.0 përfshin lirimin nga tatimi doganor për të gjitha produktet që konsiderohen si lëndë e parë për prodhim, pastaj ndryshim/plotësimin e listës së produkteve që i nënshtrohen normës së reduktuar prej 8 për qind të Tatimit mbi Vlerën e Shtuar (TVSH).
Zv/kryeministri Ramiz Kelmendi tha se kjo pako e bën industrinë e prodhuese të Kosovës të nivelit të barabartë më të gjithë prodhuesit e vendeve të rajonit.
“Pakoja fiskale 2.0 është një ndër vendimet më të mëdha që është bërë ndonjëherë në funksion të mbështetjes së prodhimtarisë vendore”.
Pas miratimit të kësaj pakoje, unë mund të them se të gjitha komponentët prodhuese, repromaterialet, nuk do të kenë doganë. Nevojitet një afat kohor implementimi, por të gjithë prodhuesit e vendit në Kosovë do të jenë të barabartë në tregun e Kosovës, me prodhuesit rajonal dhe prodhuesit e shteteve të Bashkimit Evropian”, thotë Kelmendi për Radio Evropa e Lirë.
Edhe përfaqësues të komunitetit të biznesit dhe prodhues në Kosovë shpresojnë se miratimi i kësaj pakoje do të përmirësojë kushtet, njëherësh do të stimulojë afaristët që merrem me prodhimin e produkteve, “Made in Kosova”.
