Milani pavarësisht investimeve që ka bërë në merkaton e verës, nuk ka arritur të japë atë që pritej në fushën e lojës. Kuqezinjtë kanë treguar se kanë të vështirë të ruajnë të njëjtin ritëm loje për 90’ minuta. Por në javët e fundit janë duke u përballur me një problem më të madh, atë të dëmtimit të lojtarëve të formacionit.
Nga infermieria nuk kanë ardhur lajme të mira për Giacomo Bonaventuran. Problemi në gju, që e ka detyruar të mungojë në ndeshjet e fundit, mund ta lërë larg fushave për një kohë të gjatë mesfushorin.
Në fakt, siç ka bërë të ditur “Calciomercato.it”, ish-lojtari i Atalantës mund të ndalet për disa muaj dhe është në dyshim kthimi i tij për këtë sezon. Sipas parashikimeve më optimiste, Bonaventura mund të rikuperojë në fillimin e pranverës, mes marsit dhe prillit.
Gjithsesi, situata do të jetë më e qartë pasi futbollisti t’i nënshtrohet një vizite të specializuar që do të përcaktojë edhe kohën e rikuperimit. Ndërsa probleme tek Milani mund të sjellë edhe Gonzalo Higuain. Pasi sjellja e tij në fundin e takimit me Juventusin mund të sjellë një ndëshkim të rëndë për të, me disa ndeshje.
