Milani ka arritur të fitojë një vend për në Kupat e Evropës pas fitores që arriti sot përballë Bolognës me rezultatin 3-0.
Kuqezinjtë në këtë sfidë u paraqitën me fanella të reja, të cilat do t’i bartin për edicionin 2017-2018.
Milani e nisi më mirë ndeshjen duke rrezikuar disa herë portën e miqve. Por, pa mundur të shënojë, duke bërë që pjesa e parë të përfundojë me rezultatin 0-0.
Në pjesën e dytë, trajneri Vincenzo Montella bëri dy zëvendësime tejet të qëlluara. Fillimisht futi Mati Fernandez në lojë e pastaj edhe Keisuke Hondan.
Fernandez dha asistin tek goli i parë, i shënuar nga Gerard Deulofeu në minutën e 69-të. Katër minuta më vonë, mesfushori japonez, Keisuke Honda shënoi një gol të mrekullueshëm nga gjuajtja e lirë për 2-0.
Milani nuk u ndal me vetëm dy gola, pasi në fund të ndeshjes arriti të shënojë edhe një tjetër ndaj Bolognës.
Ndërkaq, ishte sulmuesi Gianluca Lapadula, i cili mori një top të bukur nga Mati Fernandez dhe shënoi për 3-0.
Pas kësaj fitore, Milani ka siguruar pozitën e gjashtë në tabelë me 63 pikë të grumbulluara. Në këtë mënyrë kuqezinjtë do të luajnë në Ligën e Evropës vitin e ardhshëm.
