Merkato që po zhvillon Milani mund të ketë si objektiv kryesor të radhës Milot Rashicën. Lajmin e kanë përhapur sot nga mediat italiane të cilat flasin për një interesim të kuqezinjve për mesfushorin e përfaqësueses së Kosovës, i cili prej dy sezonesh po shkëlqen në kampionatin holandez me Vitesen.
Zyrtarët e Napolit kanë qenë të parët që kanë ndjekur me interes zhvillimin e Rashicës, për të cilët flitet prej një viti se duan ta bëjnë atë pasardhësin e Kajehon. Sipas “Tuttomercatoweb”, pas tyre, futbollistin 21-vjeçar e kanë ndjekur edhe përfaqësues të klubit të Udinezes, të cilët kanë kërkuar informacione më të hollësishme rreth tij.
Së fundmi është edhe Milani një prej klubeve më të interesuara për Rashicën. Kuqezinjtë vazhdojnë të shtojnë elementë të rinj me perspektivë në përbërjen e tyre, duke menduar për të ardhmen dhe Rashica është mes profileve që po monitorojnë.
Flitet se kartoni i Rashicës vlerësohet rreth 8 milionë euro nga klubi holandez, një shifër e cila përballohet pa probleme nga klubi i Milanit.
