Edhe pse u fol gjatë rreth një muaj më parë se Milani nuk do të mund të investonte në këtë merkato, ka ndodhur e kundërta. Me drejtuesit e rinj kuqezinjtë kanë qenë mjaft aktivë në këtë merkato. Kujtojmë goditjen e madhe Gonzalo Higuain dhe më pas Caldara, Bakayoko dhe së fundmi një goditje e dyfishtë, Samuel Castillejo dhe Diego Laxalt.
Dy emrat e fundit janë paraqitur ditën e sotme në Milano dhe kanë kryer vizitat mjekësore, këta ishin dy lojtarët që drejtuesit e Milanit po punonin ditët e fundit dhe është mbyllur me sukses. Mesfushori spanjoll me tipare sulmuese i Villarealit, Samu Castillejo do të mbajë fanellën me numrin 29.
Tek ekipi spanjoll do të shkojë Carlos Bacca si pjesë e marrëveshjes. Milani do tu paguaj spanjollëve 18 milionë euro dhe i gjithë operacioni do të kushtojë mbi 40 milionë euro, pasi 25 milionë është vlerësuar Bacca.
Ndërsa në mesditë ka mbërritur edhe Diego Laxalt, i cili ka kaluar me sukses testet mjekësore. Uruguaiani ishte pjesë e Interit, por pas një seri huazimesh u shit përfundimisht tek Genoa.
