Milan sfidon… Milan. Në prag të derbyt të së dielës, Skriniar ka folur për momentin që po përjeton Interi si dhe për të ardhmen.
Këto janë fjalët e tij të thëna për La Gazzetta dello Sport:
“Kur kam ardhur këtu, thuhej se çmimi ishte tepër i ekzagjeruar, por tani po shikoj që shifrat që po qarkullojnë nëpër mediat për mua janë shumë më të larta. Zërat i dëgjoj, lexoj për Barcelonën dhe klube të tjera, por jam i përqendruar vetëm tek ndeshjet e ardhshme: duhet të mendoj për ndeshjet dhe stërvitjen, çdo gjë tjetër nuk ka vlerë.”
“Me siguri e ardhmja ime tek Interi nuk është e lidhur aspak me kualifikimin në Champions League siç flitet vërdallë dhe jam i bindur që ne në Champions do të shkojmë pavarësisht vështirësive që po kalojmë, sepse Interi ka burra dhe profesionistë të një kualiteti të larte. E dashuroj këtë bluzë, ndihem shumë mirë në Milano: kam thëne një ‘po’ me plot gojën, i emocionuar dhe pa asnjë tundim kur Spalletti dhe Ausilio më morën në telefon për të më bindur për tu transferuar tek Interi.”
DREJT DERBYT – Skrinair më pas përqendrohet tek ndeshja e së dielës:
“Dëshirojmë që të ndërpresim serinë e rezultateve pozitive të Milanit. Me pak fjalë i kemi ngjallur ne në Kupën e Italisë në dhjetor dhe tani do të jetë Interi besoj që do të rinise edhe njëherë fitoret. Do i takojmë si kundërshtarë me vetëbesim dhe në një moment me formë të lartë. Ka qenë i zoti Gattuso që i ka bërë të luftojnë për çdo centimetër dhe top. Nëse do të mundesha, Milanit do i hiqja vetëm Suson. Cutrone? Sulmues i fortë, i ri dhe i motivuar. Shënon duke prekur pak topa, do duhet përqendrim ndaj tij.”
MBI MOMENTIN ZIKALTER – Sllovaku flet kështu për momentin jo zikaltër:
“Ajo që kemi bërë në ndeshjet e fundit nuk do të mjaftojë me siguri të dielën në darkë. Spalletti na e përsërit çdo ditë: duhet të bëjmë shumë më mirë, si skuadër por edhe si individë. Vijmë nga një periudhë shumë negative dhe e gjatë që as vet nuk di si ta shpjegoj. Ne stërvitemi mirë por nuk kemi mundur të shprehemi dot në fushë.”
“Probleme në dhomat e zhveshjes? Nuk është e vërtetë. Problemi jonë është psikologjik dhe është i dukshëm. Luajmë të trembur, luajmë me copëza, dhe është momenti që të tregojmë vlerat tona. Janë këto gjëra që duhet të përmirësojmë.”
“Njeriu derby? Icardi. Në ndeshjen e parë e futi topin brenda tre herë, na kanë munguar golat e tij në këtë 2018. Po, kam besim tek Maurito sepse është njëri nga ata që kam ndjerë me afër vetes në ditët e para në Milano kur nuk njihja askënd akoma.”
“Kjo do të jetë fundjava e së vërtetës që do të na japë shumë përgjigje edhe për te ardhmen. Por te mos harrojmë se edhe skuadrat para nesh do të përballen me njëra-tjetrën. Gjithsesi mendoj se Lazio, Inter, Roma dhe Milan do të luftojnë deri në fund për dy vendet që të dërgojnë në Champions.”
“Tifozët? Janë te mrekullueshëm, do të thoja unik. Mbështetja e tyre ndaj meje nuk më ka munguar kurrë, as në momentet e vështira që kemi kaluar. Të dielën loja e bukur nuk ka rendësi, dua vetëm tre pikët. Nuk kemi më kohë për shaka. Pas Milanit do të kemi Napolin, duhen fitore me peshë për të dalë nga kjo krizë tashmë e padurueshme.”
